ಈ ಕೃತಿಯ ಲೇಖಕರಾದ ಶ್ರೀ ಟಿ. ಆರ್. ಅನಂತರಾಮು ಭೂವಿಜ್ಞಾನಿ ಮತ್ತು ಜನಪ್ರಿಯ ವಿಜ್ಞಾನ ಲೇಖಕರು. ತಮ್ಮ ಶ್ರೀಮತಿಯೊಂದಿಗೆ ಪಶ್ಚಿಮಮುಖಿಯಾಗಿ ಹೊರಟು ಯೂರೋಪಿನ ಪೋರ್ಚುಗಲ್, ಸ್ಪೇನ್, ಫ್ರಾನ್ಸ್ ಹಾಗೂ ಇಟಲಿದೇಶಗಳಲ್ಲಿ ಪ್ರವಾಸ ಮಾಡಿ ಬಂದು ತಮ್ಮ ನೆನಪುಗಳನ್ನು ದಾಖಲಿಸಿದ್ದಾರೆ. ಪ್ರವಾಸದ ಪ್ರತಿಯೊಂದು ಕ್ಷಣವನ್ನೂ ಕಣ್ತೆರೆದು, ಹೃದಯ ತೆರೆದು, ಕುತೂಹಲದಿಂದ ಅನುಭವಿಸಿದ್ದಾರೆ. ಅಷ್ಟೇ ಬೆರಗಿನಿಂದ ಅಲ್ಲಿನ ಹಲವು ನಗರ-ನದಿ-ಬೆಟ್ಟಗಳನ್ನು, ಜನರನ್ನು, ಸಾವಿರಾರು ವರ್ಷಗಳ ಹಿಂದೆ ಸ್ಫೋಟಗೊಂಡ ವೆಸೂವಿಯಸ್ ಅಗ್ನಿಪರ್ವತವನ್ನು, ಅದರಿಂದ ಉಕ್ಕಿ ಹರಿದ ಲಾವಾರಸ ತನ್ನ ದಾರಿಯಲ್ಲಿ ಸಿಕ್ಕಿದುದನ್ನೆಲ್ಲ ದಹಿಸಿದುದನ್ನು, ಆಕಾಶದತ್ತ ಹರಡಿದ ಬೂದಿ ಪಾಂಪೆ ನಗರವನ್ನು ಆವರಿಸಿದ ಪರಿಯನ್ನು ನಮಗೆ ಪರಿಚಯ ಮಾಡಿಕೊಡುತ್ತಾರೆ. ಆಗಾಗ ಕನ್ನಡ ಕವಿಗಳ ಪದ್ಯ ಸಾಲುಗಳನ್ನು ನೆನಪಿಸಿಕೊಳ್ಳುತ್ತ, ಮತ್ತೆ ಆ ದೇಶಗಳ ದೃಶ್ಯಗಳಲ್ಲಿ ತನ್ಮಯರಾಗುತ್ತಾರೆ. ಪ್ರವಾಸದಲ್ಲಿ ಕಂಡ ದೃಶ್ಯವನ್ನು ವೈಜ್ಞಾನಿಕ ದೃಷ್ಟಿಯಿಂದ ಗಮನಿಸುತ್ತ ಕವಿ ಹೃದಯದಿಂದ ಸ್ಪಂದಿಸುತ್ತಾರೆ.