ಬಾಲವಿಧವೆ ಆರ್. ಕಲ್ಯಾಣಮ್ಮ ವಿದ್ಯಾಭ್ಯಾಸವನ್ನು ಪೂರ್ಣಗೊಳಿಸಿ ಸಾರ್ವಜನಿಕ ಒಳಿತಿಗಾಗಿ ತನ್ನ ಬದುಕನ್ನು ರೂಪಿಸಿಕೊಂಡ ಪರಿ ಆಶ್ಚರ್ಯಕರವಾಗಿದೆ ಹಾಗೂ ಮಾದರಿಯಾಗಿದೆ. ಕೊಳ್ಳೇಗಾಲದ 18 ಮೊಳ ನೂಲಿನ ಸೀರೆಯನುಟ್ಟು, ಕೂದಲನ್ನು ಗಂಟು ಕಟ್ಟಿ, ಹಣೆಗೆ ನಾಮವನ್ನಿಟ್ಟು ಬರಿಗಾಲಿನಲ್ಲಿಯೇ ನಡೆಯುತ್ತ ಸಮಾಜಸೇವೆಗೆ ಮುಂದಾಗುತ್ತಿದ್ದರು. ಅರಿಯದೆ ಯಾರಾದರೂ ‘ನಿಮಗೆಷ್ಟು ಮಕ್ಕಳು?‘ ಎಂದು ಕೇಳಿದರೆ ‘ಸಾವಿರದ ಒಂದು ಕಣಮ್ಮಾ!‘ ಎನ್ನುತ್ತಿದ್ದರು. ತಾವು ಕಟ್ಟಿದ ‘ಅಖಿಲ ಕರ್ನಾಟಕ ಮಕ್ಕಳಕೂಟ‘ದ ಎಲ್ಲ ಮಕ್ಕಳನ್ನು ತಮ್ಮ ಮಕ್ಕಳೆಂದೇ ಭಾವಿಸಿದ್ದರು. ‘ಆರ್.ಕಲ್ಯಾಣಮ್ಮನವರ ಮಕ್ಕಳ ಆಟದ ಮೈದಾನ‘ ಮತ್ತು ‘ಶಾರದಾ ಸ್ತ್ರೀ ಸಮಾಜ‘ ಅವರ ನೆನಪನ್ನು ಶಾಶ್ವತವಾಗಿ ಉಳಿಸಿವೆ. ಆರ್.ಕಲ್ಯಾಣಮ್ಮನವರು ಒಮ್ಮೆ ಮೈಸೂರು ಮಹಾರಾಜರ ನಾಲ್ವಡಿ ಕೃಷ್ಣರಾಜೇಂದ್ರ ಒಡೆಯರ್ ಅವರನ್ನು ಕಾಣಲು ಹೊರಟಾಗ ಸ್ವಯಂ ಮಹಾರಾಜರೇ ಹೊರಬಂದು ಸ್ವಾಗತಿಸಿದರಂತೆ! 1935ರ ದಸರಾ ಮಹೋತ್ಸವದಲ್ಲಿ ಮಹಾರಾಜರು ಕಲ್ಯಾಣಮ್ಮನವರ ಸೇವೆಯನ್ನು ಪರಿಗಣಿಸಿ ಚಿನ್ನದ ಪದಕವನ್ನು ನೀಡಿ ಸನ್ಮಾನಿಸಿದರು.