ಸ್ಟೀಫನ್ ಹಾಕಿಂಗ್ ನಮ್ಮ ನಡುವೆ ಬದುಕಿರುವ ಮಹಾನ್ ತಾತ್ವಿಕ ಭೌತಶಾಸ್ತ್ರಜ್ಞ. ಏಮಯೋಟ್ರೋಫಿಕ್ ಲ್ಯಾಟರಲ್ ಸ್ಕ್ಲೀರೋಸಿಸ್ ಎನ್ನುವ ಸ್ನಾಯು ನಶಿಸುವ ಬೇನೆಗೆ ತುತ್ತಾಗಿರುವ ಇವರು ಸದಾ ಕಾಲಕ್ಕೂ ಗಾಲಿ ಕುರ್ಚಿಯ ಬಂಧಿ. ಆದರೆ ಇವರ ಪ್ರಖರ ಮತಿಗೆ, ತೀಕ್ಷ್ಣ ವಿಚಾರಧಾರೆಗೆ ಯಾವುದೇ ಕುಂದಿಲ್ಲ. ಜನಸಾಮಾನ್ಯರಿಗಾಗಿ ಜನಪ್ರಿಯ ವಿಜ್ಞಾನ ಶೈಲಿಯಲ್ಲಿ ‘ಎ ಬ್ರೀಫ್ ಹಿಸ್ಟರಿ ಆಫ್ ಟೈಮ್‘, ‘ದಿ ಥಿಯರಿ ಆಫ್ ಎವೆರಿಥಿಂಗ್‘, ‘ದಿ ಯೂನಿವರ್ಸಸ್‘ ಮುಂತಾದ ಕೃತಿಗಳನ್ನು ಬರೆದಿರುವರು. ಅಮೆರಿಕವು ಇರಾಕ್ ಮೇಲೆ ನಡೆಸಿದ ಯುದ್ಧವನ್ನು ‘ಕ್ರೈಮ್‘ ಎಂದು ಕರೆದರು. ‘ಪರಮಾಣು ನಿಃಶ್ಯಸ್ತ್ರೀಕರಣ‘ಕ್ಕೆ ಬೆಂಬಲ ಸೂಚಿಸಿದರು. ‘ಜಾಗತಿಕ ಆರೋಗ್ಯ‘ಕ್ಕೆ ಆದ್ಯತೆಯನ್ನು ನೀಡಿದರು. ‘ಹವಾಮಾನ ಬದಲಾವಣೆ‘ಯನ್ನು ತಡೆಗಟ್ಟಬೇಕೆಂದರು. ಭೌತಿಕವಾಗಿ ನಿಶ್ಚೇಷ್ಟಿತರಾಗಿದ್ದರೂ ಬೌದ್ಧಿಕವಾಗಿ ಜಗತ್ತಿನ ಆಗು ಹೋಗುಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿರುವರು.