ಆಧುನಿಕ ವೈದ್ಯ ವಿಜ್ಞಾನದ ಪಿತಾಮಹ ‘ಹಿಪ್ಪೋಕ್ರೇಟ್ಸ್‘ ಹುಟ್ಟುವುದಕ್ಕೆ ಸುಮಾರು 150 ವರ್ಷಗಳ ಹಿಂದೆ ಹುಟ್ಟಿರಬಹುದಾದ ಸುಶ್ರುತ, ಅದುವರೆಗಿನ ಭಾರತೀಯ ಶಸ್ತ್ರವೈದ್ಯ ವಿಜ್ಞಾನದ ಅರಿವನ್ನೆಲ್ಲ ಒಂದೆಡೆ ಸಂಗ್ರಹಿಸಿ ‘ಸುಶ್ರುತ ಸಂಹಿತೆ‘ ಎನ್ನುವ ಗ್ರಂಥವನ್ನು ನಮಗೆ ನೀಡಿ ಮಹದುಪಕಾರವನ್ನು ಮಾಡಿರುವರು. ಈ ಗ್ರಂಥವು ಆಧುನಿಕ ವೈದ್ಯಕೀಯದ ಮೇಲೆ, ಮುಖ್ಯವಾದ ಶಸ್ತ್ರವಿಜ್ಞಾನದ ಮೇಲೆ ಅಪಾರ ಪ್ರಭಾವ ಬೀರಿದೆ. ಇಂದು ‘ಸುರೂಪಿಕಾ ಶಸ್ತ್ರಚಿಕಿತ್ಸೆ‘ಯನ್ನು ಸುಶ್ರುತನು ಹೇಗೆ ವರ್ಣಿಸಿರುವನೋ, ಹೆಚ್ಚು ಕಡಿಮೆ ಹಾಗೆಯೇ ಇಂದೂ ನಾವು ಮಾಡುತ್ತಿದ್ದೇವೆ. ಸುಶ್ರುತ ವಿವರಿಸಿದ 20 ಹರಿತ ಹಾಗೂ 101 ಹರಿತವಲ್ಲದ ಶಸ್ತ್ರಚಿಕಿತ್ಸಾ ಉಪಕರಣಗಳಲ್ಲಿ ಬಹುಪಾಲು ಉಪಕರಣಗಳನ್ನು ಹೆಚ್ಚಿನ ಬದಲಾವಣೆಯಿಲ್ಲದೇ ಹಾಗೆಯೇ ಉಪಯೋಗಿಸುತ್ತಿದ್ದೇವೆ. ಕಣ್ಣಿನ ಪೊರೆಯನ್ನು ಕಳೆಯಲು ಸುಶ್ರುತ ಬಳಸುತ್ತಿದ್ದ ವಿಧಾನವನ್ನೇ ಇತ್ತೀಚಿನವರೆಗೆ ಬಳಸುತ್ತಿದ್ದೆವು. ಹಿಪ್ಪೋಕ್ರೇಟ್ಸ್ ವೈದ್ಯರಿಗೆ ಒಂದು ನೀತಿ ಸಂಹಿತೆಯನ್ನು ರೂಪಿಸುವ ಮೊದಲೇ ಸುಶ್ರುತನು ವೈದ್ಯರಿಗೂ ಹಾಗೂ ವೈದ್ಯ ಅಧ್ಯಾಪಕರಿಗೂ ನೀತಿ ಸಂಹಿತೆಯನ್ನು ರೂಪಿಸಿದ್ದನು ಎನ್ನುವುದು ಹೆಮ್ಮೆಯ ವಿಚಾರ.