ಮಾರ್ಕ್ಸ್ ಮತ್ತು ಏಂಗೆಲ್ಸ್‌ರ ಸಾಮ್ಯವಾದ ಪರಿಕಲ್ಪನೆಗಳಿಗೆ ಮೂರ್ತರೂಪ ಕೊಟ್ಟು, ಜಗತ್ತಿನ ಪ್ರಥಮ ಸಮಾಜವಾದಿ ರಾಷ್ಟ್ರದ ಉದಯಕ್ಕೆ ಬುನಾದಿ ಹಾಕಿದವನು ವ್ಲಾದಿಮೀರ್ ಲೆನಿನ್. ಎಲ್ಲ ಕ್ರಾಂತಿಕಾರಿಗಳಂತೆ ಈತನ ಜೀವನವೂ ಅನೇಕ ಏಳು-ಬೀಳುಗಳನ್ನು ಕಂಡಿತ್ತು. ತ್ಸಾರ್‌ನ ಕೆಂಗಣ್ಣಿಗೆ ತುತ್ತಾಗಿ, ತಲೆಮರೆಸಿಕೊಂಡು ಜೀವನ ನಡೆಸಬೇಕಾದರೂ, ತನ್ನ ಅದಮ್ಯ ಚೇತನವನ್ನು ಬಿಟ್ಟುಕೊಡದೆ ದಮನಕಾರಿ ಅರಸೊತ್ತಿಗೆಯ ವಿರುದ್ಧ ವೈಚಾರಿಕ ಮತ್ತು ಕ್ರಿಯಾಶೀಲ ಸಮರವನ್ನು ಸಾರಿದವ ಕ್ರಾಂತಿಕಾರಿ ಲೆನಿನ್. ರಷ್ಯಾದ ಕಾರ್ಮಿಕರು, ರೈತಾಪಿ ವರ್ಗದ ಜನರು ಹಾಗೂ ಇತರ ದುಡಿಯುವ ಮಂದಿಯನ್ನು ಒಗ್ಗೂಡಿಸಿ, 1917ರ ಅಕ್ಟೋಬರ್ ಕ್ರಾಂತಿಗೆ ಮಹಾನಾಯಕ ಲೆನಿನ್ ನಾಂದಿ ಹಾಡಿದನು.

ರಷ್ಯಾದಲ್ಲಿ ಕ್ರಾಂತಿ ಜರುಗಿದ ಕೆಲವು ವರ್ಶಗಳಲ್ಲೇ ಲೆನಿನ್ ಗತಿಸಿದರೂ, ಅಲ್ಲಿನ ನೂತನ ಸರ್ಕಾರ ಆಂತರಿಕ ಮತ್ತು ಬಾಹ್ಯ ಶತ್ರುಗಳನ್ನು ದಿಟ್ಟವಾಗಿ ಎದುರಿಸಿದ್ದರಲ್ಲಿ ಈತನ ಪಾತ್ರವೂ ದೊಡ್ಡದಾಗಿತ್ತು. ಎಷ್ಟೇ ಕಾರ್ಯ ಬಾಹುಳ್ಯವಿದ್ದರೂ, ಲೆನಿನ್ ಬರವಣಿಗೆಯಲ್ಲಿ ನಿರತನಾಗುತ್ತಿದ್ದ. ಹೀಗಾಗಿ, ಆತನ ಲೇಖನಿಯ ಮೂಲಕ ಕೆಲವು ಮಹತ್ವದ ಕೃತಿಗಳು ಲೋಕಾರ್ಪಣೆಗೊಂಡಿವೆ. ಎಡಪಂಥೀಯ ಹೋರಾಟಗಳಲ್ಲಿ ಮಾರ್ಕ್ಸ್ ಮತ್ತು ಏಂಗೆಲ್ಸ್‌ರ ಜೊತೆಗೆ ಅನುಪಮ ಕೊಡುಗೆಗಳು ಸ್ಮರಿಸಲ್ಪಡುತ್ತವೆ.