ಭಾಷಾವಿಜ್ಞಾನ ತೀವ್ರಗತಿಯಿಂದ ಮುಂದುವರಿಯುತ್ತಿರುವ ಈ ಸಮಯದಲ್ಲಿ ಇಂಥ ಗ್ರಂಥದ ಅವಶ್ಯಕತೆ ವಿಫುಲವಾಗಿದೆ. ಈ ಹಿಂದೆ ಬಂದ ಒಂದೆರಡು ಗ್ರಂಥಗಳು ಹಳೆವನೆನಿಸಿದ್ದರಿಂದ, ಇಂದಿನವರೆಗೆ ನಡೆದ ಸಂಶೋಧನೆಗಳನ್ನು ಅಳವಡಿಸಿಕೊಂಡು ಬರೆದ ಗ್ರಂಥದ ಅವಶ್ಯಕತೆ ಹೆಚ್ಚಾಗಿತ್ತು. ಪ್ರಸ್ತುತ ಗ್ರಂಥವು ಈ ಅವಶ್ಯಕತೆಯನ್ನು ಅತಿ ತೃಪ್ತಿಕರವಾಗಿ ಪೂರೈಸುತ್ತದೆ.

ಭಾಷೆ, ಭಾಷಾಧ್ಯಯನ, ಧ್ವನಿಶಾಸ್ತ್ರ, ಧ್ವನಿಮಾಶಾಸ್ತ್ರ, ಅಕೃತಿಮಾಶಾಸ್ತ್ರ, ವಾಕ್ಯರಚನಾಶಾಸ್ತ್ರ, ಶಾಬ್ದಾರ್ಥಶಾಸ್ತ್ರ ಈ ಗ್ರಂಥದ ಚೌಕಟ್ಟು. ಪ್ರತಿಯೊಂದು ಭಾಗದಲ್ಲಿಯೂ ಲೇಖಕರ ಆಳವಾದ ಅಧ್ಯಯನ, ಖಚಿತವಾದ ವಿವರಣೆ ಗೋಚರವಾಗುತ್ತದೆ. ಪರಿಭಾಷೆಗಳನ್ನು ಜೋಕೆ, ತೂಕಗಳಿಂದ ಬಳಸಿ, ಓದುಗರಿಗೆ ಅರ್ಥ ವಿವರನೆಯಾಗುವಂತೆ ನೋಡಿಕೊಂಡಿದ್ದಾರೆ.

ಈ ಗ್ರಂಥವನ್ನು ಭಾಷಾಶಾಸ್ತ್ರಕ್ಕೆ ಸಂಬಂಧಪಟ್ಟ ವಿದ್ಯಾರ್ಥಿಗಳು ಪಠ್ಯವೆಂದು ಓದುವರಾದರೂ, ಇದು ಕೇವಲ ಪಠ್ಯ ಗ್ರಂಥವಲ್ಲ, ಭಾಷಾಶಾಸ್ತ್ರದ ಅಧ್ಯಯನ, ಅಧ್ಯಾಪನ, ಅನುಭವಗಳಿಂದ ಹೊರಹೊಮ್ಮಿದ ಒಂದು ಸ್ವತಂತ್ರ ಕೃತಿ, ಉತ್ತಮ ಕೃತಿ.