ಆಗಸ್ಟ್ 8, 1942 ಮುಂಬೈ ಸಭೆಯಲ್ಲಿ ಅಖಿಲ ಭಾರತ ಕಾಂಗ್ರೆಸ್ ಸಮಿತಿಯು ‘ಬ್ರಿಟೀಷರೆ! ಭಾರತ ಬಿಟ್ಟು ತೊಲಗಿ‘ ಆಂದೋಲನವನ್ನು ಆರಂಭಿಸುವ ಒಪ್ಪಿಗೆಯನ್ನು ಸೂಚಿಸಿತು. ಈ ಘೋಷಣೆಯು ಹೊರಬೀಳುತ್ತಿರುವಂತೆಯೇ ಬ್ರಿಟಿಷ್ ಸರ್ಕಾರವು ಕಾಂಗ್ರೆಸ್ ಕಾರ್ಯಕಾರಿ ಸಮಿತಿಯ ಎಲ್ಲ ಸದಸ್ಯರನ್ನು ಬಂಧಿಸಿತು. ಅವರೆಲ್ಲರನ್ನು ವಿಶೇಷ ರೈಲು ಬೋಗಿಯಲ್ಲಿ ತುಂಬಿ ಅಪರಿಚಿತ ಪ್ರದೇಶಕ್ಕೆ ರವಾನಿಸಿತು. ಮುಂಬೈ ಗೊವಾಲಿಯ ಕೆರೆ ಮೈದಾನದಲಿ ರಾಷ್ಟ್ರ ಧ್ವಜಾರೋಹಣಕ್ಕೆ ಎಲ್ಲ ವ್ಯವಸ್ಥೆಗಳು ನಡೆದವು. ಧ್ವಜಾರೋಹಣ ಆಗುತ್ತಿರುವಂತೆಯೇ ಚಳವಳಿಯೂ ಆರಂಭವಾಗುತ್ತಿತ್ತು. ಆದರೆ ರಾಷ್ಟ್ರಧ್ವಜವನ್ನು ಮೇಲೇರಿಸಬೇಕಾದ ಮೌಲಾನ ಅಬ್ದುಲ್ ಕಲಾಂ ಆಜ಼ಾದ್ ಎಲ್ಲಿಯೂ ಕಾಣಲಿಲ್ಲ. ಜನ ಧ್ವಜಾರೋಹಣಕ್ಕೆ ಕಾಯುತ್ತಿದ್ದರು. ನಿಗದಿತ ಸಮಯ ಬರುತ್ತಿರುವಂತೆಯೇ ಅರುಣಾ ಅಸಫ್ ಅಲಿಯವರು ನೇರವಾಗಿ ವೇದಿಕೆಯನ್ನು ಏರಿ ಧ್ವಜಾರೋಹಣವನ್ನು ಮಾಡಿಯೇಬಿಟ್ಟರು! ನೀಲಾಕಾಶದಲ್ಲಿ ಧ್ವಜ ಹಾರಾಡಲಾರಂಭಿಸಿತು! ಇದನ್ನು ಕಂಡ ಜನಸ್ತೋಮದ ಜಯಕಾರ ಮುಗಿಲುಮುಟ್ಟಿತು! ಅರುಣಾ ಭೂಗತರಾದರು. ಬ್ರಿಟಿಷ್ ಸರ್ಕಾರ ಆಕೆಯ ಮನೆ ಹಾಗೂ ಕಾರನ್ನು ಮುಟ್ಟುಗೋಲು ಹಾಕಿಕೊಂಡಿತು! ಆಕೆಯ ತಲೆಯ ಮೇಲೆ ರೂ.5000 ಬಹುಮಾನವನ್ನು ಘೋಷಿಸಿತು!!