ಭಾರತ ದೇಶದ ಬಹುದೊಡ್ಡ ಶಾಪವೆಂದರೆ ಜಾತಿ ಪದ್ಧತಿ. ಪದ್ಮಶ್ರೀ ಬಿ.ಪಿ. ರಾಧಾಕೃಷ್ಣರವರು ತಮ್ಮ ಜಾತಿಯ ಕಾರಣದಿಂದ ಅನುಭವಿಸುವ ಸಾಮಾಜಿಕ ಅವಮಾನಗಳು ಅಸಂಖ್ಯ. ಆದರೆ ಅವರು ಜಾತಿಗೆ ಎಂದೂ ಬೆಲೆಕೊಡಲಿಲ್ಲ. ಬದಲಿಗೆ ‘ಹಿಂದುಳಿದ ಕೋಮಿನವರು ನಾವು ಹಿಂದುಳಿದವರು ಎಂದು ಹೇಳಿಕೊಳ್ಳಲು ಹೆಮ್ಮೆಪಡುತ್ತಾರೆಯೇ ವಿನಾ ಆ ಹೆಸರು ತೊಡೆದು ಹೋಗುವಂತೆ ಪ್ರಯತ್ನ ಪಡುತ್ತಿಲ್ಲ. ನಾನು ಹಿಂದುಳಿದ ಕೋಮಿನವನು, ನನಗೆ ಕೆಲಸ ಕೊಡಿ ಎಂದು ಕೇಳಿಬರುವ ಕೂಗು ಕಡಿಮೆಯಾಗಬೆಕು. ಹಿಂದುಳಿದವನು ಎಂದು ಹೇಳಿಕೊಳ್ಳುವುದು ಹೆಮ್ಮೆಯ ವಿಷಯವಲ್ಲ‘ ಎಂದು ಕಲಿಕೆಗೆ ಮಹತ್ವ ಕೊಟ್ಟರು. ಇವರ ಧೀಃಶಕ್ತಿ ಯಾವ ಪ್ರಮಾಣದಲ್ಲಿತ್ತೆಂದರೆ ಕೋಲಾರದ ಚಿನ್ನದ ನಿಕ್ಷೇಪಗಳಲ್ಲಿ ಲೆಡ್ ಟೆಲ್ಯೂರಿಯಂ ಸಲ್ಫೈಡ್ ಖನಿಜವನ್ನು ವಿವರಿಸಿದ ಡಾ. ಗೆಂಕ್ಲಿನ್ ಎಂಬ ವಿಜ್ಞಾನಿಯು, ಆ ಖನಿಜಕ್ಕೆ ‘ರಾಧಾಕೃಷ್ಣೈಟ್‘ ಎಂದು ನಾಮಕರಣ ಮಾಡಿ ಗೌರವ ಸಲ್ಲಿಸುತ್ತಾರೆ. ರಾಧಾಕೃಷ್ಣರವರು ಬರೆದ ‘ಅಂತರ್ಜಲ‘ ಎನ್ನುವ ಕೃತಿಯು ಅಂತರ್ಜಲ ವಿಜ್ಞಾನದ ಬೈಬಲ್ ಎಂದೇ ಹೆಸರಾಗಿದೆ.