ನಾಸ್ತಿಕರಾಗಿದ್ದ ಬಾಬಾ ಆಮಟೆ ಮಹಾನ್ ಮಾನವತಾವಾದಿ, ಪದ್ಮವಿಭೂಷಣ, ರಾಮನ್ ಮ್ಯಾಗ್ಸೆಸೆ, ಗಾಂಧಿ ಶಾಂತಿ ಪ್ರಸಸ್ತಿ, ಜಮ್ನಾಲಾಲ್ ಬಜಾಜ್ ಪ್ರಶಸ್ತಿ ಮುಂತಾದ ಅಸಂಖ್ಯ ಪ್ರಶಸ್ತಿಗಳು ಹಾಗೂ ಗೌರವ ಡಾಕ್ಟೋರೇಟ್ ಪ್ರಶಸ್ತಿಗಳನ್ನು ಗಳಿಸಿದ್ದ ಆಮಟೆಯವರ ಬದುಕನ್ನು ಗಾಂಧೀಜಿ, ರವೀಂದ್ರನಾಥ ಠಾಕೂರ್ ಹಾಗೂ ಸಾಣೇ ಗುರೂಜಿಯವರ ತತ್ವಗಳು ರೂಪಿಸಿದವು. ರಾಜಕೀಯದಿಂದ ದೂರವಿದ್ದ ಆಮಟೆಯವರು ನ್ಯಾಯವಾದಿಯಾಗಿ ಸ್ವಾತಂತ್ರ್ಯ ಹೋರಾಟಾಗಾರರ ಪರವಾಗಿ ವಾದಿಸಿದರು. ಕುಷ್ಠ ರೋಗಿಗಳಿಗೆ ಪುನರ್ವಸತಿಯನ್ನು ಕಲ್ಪಿಸಿಕೊಟ್ಟರು. ನರ್ಮದಾ ಆಂದೋಲನದಂತಹ ಪರಿಸರ ರಕ್ಷಣಾ ವಿಷಯಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡರು. ತಮ್ಮ ಯೌವನದ ದಿನಗಳಲ್ಲಿ ಚಲನಚಿತ್ರಗಳನ್ನು ತುಂಬಾ ಇಷ್ಟಪಡುತ್ತಿದ್ದ ಆಮಟೆ ಪತ್ರಿಕೆಯೊಂದಕ್ಕೆ ಚಿತ್ರ ವಿಮರ್ಶೆ ಬರೆಯುತ್ತಿದ್ದರು. ಗ್ರೆಟಾ ಗಾರ್ಬೋ, ನಾರ್ಮನ್ ಶೀರರ್ ಮುಂತಾದ ಹಾಲಿವುಡ್ ನಟಿಯರೊಡನೆ ಸಂಪರ್ಕವನ್ನಿಟ್ಟುಕೊಂಡಿದ್ದರು. ಆಮಟೆ ಕುಷ್ಠ ರೋಗಿಗಳ ಪುನರ್ವಸತಿಯ ಕೆಲಸವನ್ನಾರಂಭಿಸಿದಾಗ ನಾರ್ಮನ್ ಶೀರರ್ ಮೊದಲ ದೇಣಿಗೆಯನ್ನು ನೀಡಿದರು!