ಭಾರತ ಸಂವಿಧಾನದ ಪ್ರಕಾರ 6-14 ಪ್ರಾಯದ ಎಲ್ಲ ಮಕ್ಕಳೂ ಶಾಲೆಯಲ್ಲಿರಬೇಕು. ಶಿಕ್ಷಣ ಪಡೆಯುವುದು ಮಕ್ಕಳ ಮೂಲಭೂತ ಹಕ್ಕು. ಹೆತ್ತವರು ಮತ್ತು ಸರಕಾರಗಳು ಮಕ್ಕಳಿಗೆ ಶಿಕ್ಷಣ ನೀಡುವ ಜವಾಬ್ದಾರಿ ಹೊರಬೇಕು. ಇಲ್ಲವಾದರೆ ಅದು ಶಿಕ್ಷಣ ಹಕ್ಕು ಕಾಯ್ದೆ ಪ್ರಕಾರ ಶಿಕ್ಷಾರ್ಹ ಅಪರಾಧವಾಗುತ್ತದೆ. ಆದರೆ ವಸ್ತುಸ್ಥಿತಿ ತದ್ವಿರುದ್ಧವಾಗಿದೆ. ಏನಾದರೊಂದು ಕಾರಣಕ್ಕೆ ಕಲಿಕೆಯಿಂದ ವಂಚಿತರಾಗುವ, ಬಡತನ ಅಥವಾ ಮನೆಯಲ್ಲಿ ಕಲಿಕೆಗೆ ಸಹಾಯಕವಾಗುವ ವಾತಾವರಣವಿಲ್ಲದ ಕಾರಣ ಅರ್ಧಕ್ಕೆ ಓದು ನಿಲ್ಲಿಸಿ ಬಾಲಕಾರ್ಮಿಕರಾಗುವ ಮಕ್ಕಳ ಸಂಖ್ಯೆಯೂ ಅಧಿಕವಾಗಿದೆ. ಕಲಿಯುವ ವಾತಾವರಣವಿದ್ದಾಗಲೂ ಆಧುನಿಕ ಕಾಲದ ಪ್ರಭಾವದಿಂದ ಬೇರೆ ಬೇರೆ ವಿಷಯಗಳನ್ನು ಕಲಿಯುವ ಒತ್ತಡದಿಂದ ತತ್ತರಿಸುವ ಮಕ್ಕಳಿಗೆ, ಅವರ ಒತ್ತಡವನ್ನು ಕಡಿಮೆ ಮಾಡಲು, ಉಪಾಯಗಳನ್ನು ಈ ಕೃತಿಯಲ್ಲಿ ಸೂಚಿಸಲಾಗಿದೆ. ಮಕ್ಕಳು ಬಾನಾಡಿಗಳಂತೆ. ಅವರ ರೆಕ್ಕೆ ಪುಕ್ಕ ಕತ್ತರಿಸಿ ಅವರನ್ನು ಪಂಜರದಲ್ಲಿ ಕೂಡಿ ಹಾಕದೆ, ಅವರ ಬದುಕಿನ ಪಾಠಗಳನ್ನು ಅವರೇ ಕಲಿಯಲು ಸಹಾಯಕರಾಗಬೇಕು. ಇದು ಈ ಕೃತಿಯ ಸಂದೇಶ. ಲೇಖಕರು ತಮ್ಮ ಬಾಲ್ಯದ ಕಲಿಕೆಯ ಅನುಭವಗಳನ್ನು ಇಲ್ಲಿ ಹೇಳಿಕೊಂಡಿದ್ದಾರೆ.