‘ಬೆಳಗಾಂ ಜಿಲ್ಲೆಯ ಜನಪದ ಕಥೆಗಳು’ ಬೆಳಗಾಂ ಜಿಲ್ಲೆಯ ಸೌದತ್ತಿ, ರಾಮದುರ್ಗ ಮತ್ತು ಗೋಕಾಕ್ ತಾಲ್ಲೂಕಿನ ಸುತ್ತಮುತ್ತ ಸಂಗ್ರಹಿಸಿದ ಕತೆಗಳ ಸಂಕಲನ. ಈ ಸಂಕಲನದ ಕತೆಗಳನ್ನು ಅನೇಕ ವರ್ಗದವರಿಂದ ಹಾಗೂ ವಿವಿಧ ವಯೋಧರ್ಮದವರಿಂದ ಸಂಗ್ರಹಿಸಿರುವುದರಿಂದ ಹೇಳುವ ವಿಧಾನದಲ್ಲಿ, ಅನುಭವದ ವ್ಯಾಪ್ತಿಯಲ್ಲಿ ಅಂತರವನ್ನು ಸ್ವಲ್ಪಮಟ್ಟಿಗೆ ಗುರುತಿಸಬಹುದಾಗಿದೆ. ಪ್ರಾದೇಶಿಕ ದೃಷ್ಟಿ ಪ್ರಧಾನವಾದ ಇಂಥ ಸಂಕಲನಗಳಲ್ಲಿ ಕತೆಗಳ ವೈವಿಧ್ಯದ ಸೊಗಸನ್ನು ತಿಳಿಯಬಹುದು. ಈ ಸಂಕಲನದಲ್ಲಿರುವ ಕಥೆಗಳ ಭಾಷೆಯನ್ನು ಸರಳಗೊಳಿಸಿ, ವಿಶಿಷ್ಟ ಪದಗಳು ಮತ್ತು ನುಡಿಗಟ್ಟುಗಳನ್ನು ಮಾತ್ರ ಮೂಲಭಾಷೆಯಲ್ಲಿ ಉಳಿಸಿಕೊಳ್ಳಲಾಗಿದೆ.