ಬುದ್ಧಿಜೀವಿಗಳ ಸಾಮಾಜಿಕ ನೆಲೆಗಟ್ಟು ಹಾಗೂ ಅವರ ರಾಜಕೀಯ ಕಾರ್ಯಸೂಚಿಗಳ ನಡುವಿನ ನಿಕಟ ಸಂಬಂಧಗಳನ್ನು ಸೈದ್ಧಾಂತಿಕ ಹಿನ್ನೆಲೆಯಲ್ಲಿ ಮತ್ತು ಪ್ರಾಯೋಗಿಕ ಅಧ್ಯಯನಗಳಿಂದ ಕಂಡುಕೊಂಡ ಸತ್ಯಾಂಶಗಳ ಮೂಲಕ ಈ ಕೃತಿಯು ಪರಾಮರ್ಶಿಸುತ್ತದೆ. ಸಮಾಜದ ಆಳುವ ವರ್ಗಗಳೊಂದಿಗೆ ಬುದ್ಧಿಜೀವಿಗಳು ಹೊಂದಿರುವ ಸಂಬಂಧಗಳಲ್ಲಿನ ಸ್ಥಿತ್ಯಂತರಗಲನ್ನು ವಿಶ್ಲೇಷಿಸುವ ಮೂಲಕ ಬುದ್ಧಿಜೀವಿಗಳ ರಾಜಕಾರಣವನ್ನು ಅರಿತುಕೊಳ್ಳಲು ಸಾಧ್ಯವೆಂಬುದನ್ನು ಇಲ್ಲಿ ನಿರೂಪಿಸಲಾಗಿದೆ. ಇಟಲಿಯ ಮಾರ್ಕ್‍ವಾದಿ ಚಿಂತಕ ಆಂಟನಿಯೋ ಗ್ರಾಮ್ಸಿ ಪ್ರತಿಪಾದಿಸುವ ಸಾಂಸ್ಕೃತಿಕ ಯಜಮಾನಿಕೆಯ ಸಿದ್ಧಾಂತದ ಅರ್ಥಪೂರ್ಣ ವಿಶ್ಲೇಷಣೆಯಾಗಿ ಈ ಕೃತಿ ರೂಪುಗೊಂಡಿದೆ.