ಯಾವುದೇ ಸಾಹಿತ್ಯ ಎತ್ತರದ ನೆಲೆಯದಾಗಬೇಕಾದರೆ ಅದರಲ್ಲಿ ಉತ್ತಮ ರೀತಿಯ ಮಕ್ಕಳ ಸಾಹಿತ್ಯವೂ ಇರಬೇಕಾಗುತ್ತದೆ. ಕನ್ನಡದಲ್ಲಿ ಪಂಜೆ, ಕುವೆಂಪು, ರಾಜರತ್ನಂ, ಹೊಯ್ಸಳರಂತ ನವೋದಯ ಸಾಹಿತಿಗಳು ಮಕ್ಕಳಿಗಾಗಿ ಉತ್ಕೃಷ್ಟ ಕವಿತೆಗಳನ್ನು ರಚಿಸಿದ್ದಾರೆ. ನಂತರ ಬಂದ ನವ್ಯ ಸಾಹಿತ್ಯದಲ್ಲಿಯೂ ವೆಂಕಟೇಶ ಮೂರ್ತಿ, ಸುಮತೀಂದ್ರ ನಾಡಿಗ ಮೊದಲಾದವರು ಈ ಸಂಬಂಧ ಶ್ಲಾಘ್ಯ ಕೆಲಸ ಮಾಡಿದ್ದಾರೆ. ಚಂದಿರ ಶಾಲೆ ಪುಸ್ತಕದಲ್ಲಿ ಮಕ್ಕಳ ಮನಸ್ಸಿಗೆ ಮುದ ನೀಡುವ ವಸ್ತು ವೈವಿಧ್ಯ ಇದೆ; ಅವರ ಕಿವಿಸೆಳೆಯುವ, ಹಗುರ ನಡಿಗೆಯ ಸುಲಭ ಸುಂದರ ರಚನೆಗಳಿವೆ. ಆನೆ ಬಂತು, ಜೋಗುಳ, ದೀಪ, ತರಕಾರಿ - ಇಂಥ ಹಲವಾರು ರೋಚಕ ಪದ್ಯಗಳು ಮಕ್ಕಳಿಗೆ ಪ್ರಿಯವಾಗಬಲ್ಲವು. ಈ ಸಂಕಲನದ ಕೆಲವು ಪದ್ಯಗಳಿಗೆ ಚಿತ್ರಗಳೂ ಇರುವುದರಿಂದ ಈ ಪುಸ್ತಕ ಇನ್ನಷ್ಟು ರಂಜಕವಾಗುವುದರಲ್ಲಿ ಸಂದೇಹವಿಲ್ಲ.