ಚಾರ್ಲ್ಸ್ ಡಾರ್ವಿನ್ನನ ಹೆಸರು ವಿಜ್ಞಾನದ ಇತಿಹಾಸದಲ್ಲಿ ಬಹಳ ಪ್ರಖ್ಯಾತವಾದುದು. ಆತ ಪ್ರತಿವಾದಿಸಿದ ವಿಚಾರಗಳು ವಿಜ್ಞನ ಪ್ರಪಂಚದಲ್ಲಿ ದೊಡ್ಡ ಕ್ರಾಂತಿಯನ್ನುಂಟು ಮಾಡಿದುವಲ್ಲದೆ, ಧರ್ಮ ಮತ್ತು ತತ್ವಶಾಸ್ತ್ರಗಳ ಮೇಲೆಯೂ ಅಗಾಧ ಪ್ರಭಾವ ಬೀರಿದವು. ವಿಜ್ಞಾನಾಸಕ್ತರು ಆತನ ವಿಚಾರಗಳನ್ನು ಕುತೂಹಲದಿಂದ ಸ್ವೀಕರಿಸಿದರಾದರೆ, ಸಂಪ್ರದಾಯವಾದಿಗಳು ಆತನನ್ನು ಉಗ್ರವಾಗಿ ವಿರೋಧಿಸಿದರು. ಪ್ರಾಣಿ ಮತ್ತು ಸಸ್ಯಜೀವಿಗಳು ಪ್ರಕೃತಿಯ ಆಯ್ಕೆಯ ಪರಿಣಾಮವೆಂಬ ವಾದ, ಜಗತ್ತಿನ ಸರ್ವವ್ಯಾಪಾರವೂ ಜಗನ್ನಿಯಾಮಕನಾದ ಭಗವಂತನ ಇಚ್ಛೆಯಂತೆ ನಡೆಯುತ್ತದೆ ಎಂದು ನಂಬಿದ್ದವರಿಗೆ ರುಚಿಸಲಿಲ್ಲ. ಆದರೆ ವಿಜ್ಞಾನದ ಕುರಿತ ಅರಿವು ಹೆಚ್ಚಿದಂತೆಲ್ಲ ಡಾರ್ವಿನ್ನನ ವಿಚಾರಗಳು ಮೇಲುಗೈ ಪಡೆಯತೊಡಗಿದವು. ಆತನ ಪ್ರತಿಪಾದನೆಗಳಿಗೆ ವಿವಾದಕ್ಕೆ ಎಡೆಯಿಲ್ಲದಂತಹ ಖಚಿತ ಪ್ರಮಾಣಗಳು ಆಧಾರವಾಗಿದ್ದವು. ‘ಚಾರ್ಲ್ಸ್ ಡಾರ್ವಿನ್ ಆತ್ಮಕಥೆ’ ಆತನ ಜೀವನದ ಹಲವು ಸ್ವಾರಸ್ಯಕರ ಘಟನೆಗಳನ್ನು, ಆತನ ದಣಿವರಿಯದ ಪ್ರವಾಸವನ್ನು, ನಿರಂತರ ಅಧ್ಯಯನ ಪ್ರವೃತ್ತಿಯನ್ನು ಪರಿಚಯ ಮಾಡಿಕೊಡುವ ಪುಸ್ತಕ.