ಆಚಾರ್ಯ ಧರ್ಮಾನಂದ ಕೊಸಾಂಬಿ ಪ್ರಖ್ಯಾತ ಬೌದ್ಧ ಧರ್ಮದ ವಿದ್ವಾಂಸರು. ಬೌದ್ಧ ಧರ್ಮ ಗ್ರಂಥಗಳನ್ನು ಅಧ್ಯಯನ ಮಾಡಲೆಂದೇ ಪಾಲಿ, ಸಿಂಹಳೀ, ಬರ್ಮೀ ಭಾಷೆಗಳನ್ನು ಕಲಿತರು. ಹಾರ್ವರ್ಡ್ ವಿಶ್ವವಿದ್ಯಾಲಯದ ಡಾ. ಜೇಮ್ಸ್ ವುಡ್ ಅವರ ಸಹಯೋಗದಲ್ಲಿ ಬೌದ್ಧ ಧರ್ಮದ ಪ್ರಮುಖ ಕೃತಿ ‘ವಿಶುದ್ಧಿಮಗ್‘ವನ್ನು ಸಂಪಾದಿಸಿದರು. ಕೊಸಾಂಬಿಯವರ ಬೌದ್ಧ ಧರ್ಮದ ಜ್ಞಾನ ಎಷ್ಟು ಆಳವಾಗಿರುತ್ತದೆಯೆಂದರೆ ಬಾಬಾ ಸಾಹೇಬ್ ಅಂಬೇಡ್ಕರ್ ಹಿಂದು ಧರ್ಮವನ್ನು ತ್ಯಜಿಸಿ ಬೌದ್ಧ ಧರ್ಮವನ್ನು ಸ್ವೀಕರಿಸಲು ಕೊಸಾಂಬಿಯವರೇ ಕಾರಣರು ಎಂದರೆ ಅದು ತಪ್ಪಾಗಲಾರದು. ಕೊಸಾಂಬಿಯವರು ಜೈನ ಧರ್ಮವನ್ನೂ ಆಳವಾಗಿ ಅಧ್ಯಯನ ಮಾಡಿದ್ದರು. ಜೈನ ಧರ್ಮದಲ್ಲಿ ಇಂದಿಗೂ ಆಚರಣೆಯಲ್ಲಿರುವ ಸಲ್ಲೇಖನ ವ್ರತವನ್ನು ಕೈಗೊಂಡು ಜೀವವನ್ನು ಬಿಡಲು ಪ್ರಯತ್ನಿಸಿದಾಗ, ಅದಕ್ಕೆ ಗಾಂಧೀಜಿಯವರು ಅಡ್ಡ ಬರುತ್ತಾರೆ. ಆದರೆ ಮತ್ತೆ ಕೊಸಾಂಬಿಯವರು ಸಲ್ಲೇಖನ ವ್ರತವನ್ನಾರಂಭಿಸಿದಾಗ ಗಾಂಧೀಜಿಯವರು ಅಡ್ಡ ಬರುವುದಿಲ್ಲ. 30 ದಿನಗಳ ವ್ರತದ ನಂತರ ಕೊಸಾಂಬಿಯವರು ಮರಣಿಸುತ್ತಾರೆ.