ಇಲ್ಲಿನ ಕೆಲವು ಆರಂಭದ ಬರಹಗಳಿಗೆ ಸುಮಾರು ನಲವತ್ತಕ್ಕೂ ಹೆಚ್ಚು ವರ್ಷ ವಯಸ್ಸಾಗಿದೆ. ಎಲ್ಲೆಲ್ಲೋ ಇದ್ದವು. ಯಾರ‍್ಯಾರ ಬಳಿಯೋ ಇದ್ದವು. ಯಾವ್ಯಾವ ರೂಪದಲ್ಲೋ ಇದ್ದವು. ಇವುಗಳನ್ನು ಹುಡುಕುವುದು, ಸಿಕ್ಕಿದ ಬರಹಗಳಲ್ಲಿ ಕೆಲವು ಕಡೆ ಇಲ್ಲದ ಭಾಗವನ್ನು ಅಂದಾಜಿಸಿ ಬರೆಯುವುದು, ಪುನರುಕ್ತಿ ತೆಗೆಯುವುದು ಹೀಗೆ ಒಂದು ಲೇಖನವನ್ನು ಎರಡಾಗಿಸಿದ್ದೂ ಇದೆ. ಹಾಗೆ ಎರಡು ಲೇಖನಗಳನ್ನು ಒಂದು ಮಾಡಿದ್ದೂ ಇದೆ, ಜೊತೆಗೆ ಒಂದೆರಡು ಲೇಖನಗಳನ್ನು ಮೂಲ ಲೇಖನವನ್ನು ಆಧರಿಸಿ ಹೆಚ್ಚು ಕಮ್ಮಿ ಹೊಸದಾಗೆ ಬರೆದಂತೂ ಆಗಿದೆ. ಇದೊಂದು ರೀತಿ ಉತ್ಖನನ, ಗ್ರಂಥಸಂಪಾದನೆ, ಸಂಕಲಿಸುವುದು ಇತ್ಯಾದಿ ಆಗುತ್ತ, ಇದೊಂದು ಪಯಣ ಜೊತೆಗೆ ಹಳೆಯ ಮನೆಯ ರಿಪೇರಿಯಂತೆಯೂ ಆಗಿಬಿಟ್ಟಿತು.