ಸಂಗೀತವೆಂಬುದು ಮಹಾಸಾಗರವಿದ್ದಂತೆ. ಇದರಲ್ಲಿ ತೇಲುವವನಿಗಿಂತ ಮುಳುಗುವವರೇ ಹೆಚ್ಚುಮಂದಿ. ಅದರ ಆಳದ ಅರಿವು ಯಾರ ಕೈ ಎಟುಕಿನಲ್ಲಿಲ್ಲದಿದ್ದರೂ ಸಂಗೀತ ಸಾಧಕನ ಮನೋಸ್ಥಿತಿಗೆ ಸಂಬಂಧ ಪಟ್ಟ ಕಥಾವಸ್ತುವೇ ಈ ಹಿರಿಯ ಲೇಖಕರಿಂದ ಮೂಡಿಬಂದಿದೆ. ಮೊದಲ ಭಾಗದಲ್ಲಿ ನಾಯಕನ ನಡೆ, ನುಡಿ, ಆತ್ಮಸ್ಥೈರ್ಯ, ಅವರ ಸಾಧನೆಯ ಬಗ್ಗೆ ವಿವರಣೆಯಿದ್ದರೆ ದ್ವಿತೀಯ ಭಾಗದಲ್ಲಿನ ಕಥಾನಾಯಕ ರಾಮುವಿಗೆ ಸಂಗೀತವೇ ಸರ್ವಸ್ವ. ಪ್ರಾಪಂಚಿಕ ವ್ಯವಹಾರದಲ್ಲಿ ಆತನ ಸಾಧನೆ ಶೂನ್ಯ. ಈ ಸಂಗೀತ ಸಾಧನೆ ಆ ಕಲಾವಿದನ ಏಳು ಬೀಳುಗಳ ಸಂಘರ್ಷ. ಇದರಲ್ಲಿ ಆತ ಜಯಶಾಲಿಯಾಗುವನೇ ಇಲ್ಲವೇ ಎನ್ನುವುದು ಕುತೂಹಲಕಾರಿ ಅಂಶ. ಮ.ನ. ರವರಾದರೂ ಪರಿಪಕ್ವ ಲೇಖಕರು. ಇವರ ಲೇಖನಿಯಿಂದ ಮೂಡಿಬಂದ ಪ್ರತಿಯೊಂದು ಪಾತ್ರವು ಜೀವಂತವಾಗಿ ನಿಜ ಜೀವನಕ್ಕೆ ಹತ್ತಿರವಾಗಿದೆ. ಅನುಭವದ ಲೇಖನಿಯಿಂದ ಮೂಡಿಬಂದ ಪ್ರತಿಯೊಂದು ಪಾತ್ರದ ಈ ಕಥಾವಸ್ತು ಓದುಗರ ಮನಸೂರೆಗೊಳ್ಳುವುದರಲ್ಲಿ ಸಂಶಯವಿಲ್ಲ.