ಇಂಡಿಯಾ ಮತ್ತು ಇರಾನ್ - ಈ ಎರಡು ಹೆಸರುಗಳ ಸಂಯುಕ್ತ ಪದವೇ "ಇಂಡಿರಾನ್". ಈ ಶೀರ್ಷಿಕೆಗೆ ತಕ್ಕಂತೆ ಕಾದಂಬರಿ ಇಂಡಿಯಾ ಮತ್ತು ಇರಾನ್ ದೇಶಗಳ ಇಬ್ಬರು ಪ್ರಜೆಗಳು - ಇರಾನ್‍ನ ಹೆಣ್ಣು, ಇಂಡಿಯಾದ ಗಂಡು - ಇವರ ಮುಖಾಮುಖಿಯನ್ನು ನಿರೂಪಿಸುತ್ತದೆ. ಇದು ಪರಸ್ಪರ ಪತ್ರವ್ಯವಹಾರದ ಮೂಲಕ ಕುದುರುವ ಮನಸ್ಸುಗಳ ಮುಖಾಮುಖಿಯೇ ಹೊರತು ಸಶರೀರ ಮುಖಾಮುಖಿಯಲ್ಲ. ಹಲವು ವರ್ಷಗಳ ಹಿಂದೆ, ಕಾದಂಬರಿಯ ನಿರೂಪಕ ಮತ್ತು ಇರಾನ್‍ನ ಆ ಹೆಣ್ಣು ಮಗಳು ರೋಫೆ, ಇಬ್ಬರೂ ಹದಿಹರೆಯದವರಾಗಿದ್ದಾಗ ಪರಸ್ಪರ ಸಂಧಿಸಿ, ಪರಿಚಯ ಮಾಡಿಕೊಂಡ ನೆನಪು ಮತ್ತು ಅದರ ಮುಂದುವರಿಕೆಯಾಗಿ ಈ ದೀರ್ಘ ಕಾಲಾವಧಿಯ ಉದ್ದಕ್ಕೂ ಇ-ಅಂಚೆಯ ಪತ್ರ ವಿನಿಮಯದಿಂದಾಗಿ ಉಳಿದುಕೊಂಡ ಸಂಬಂಧ ಇದು ಸ್ಥೂಲವಾಗಿ ಕಾದಂಬರಿಯ ವಸ್ತು.
(ಜಿ. ರಾಜಶೇಖರ್ ಅವರ ಮುನ್ನುಡಿಯಿಂದ)