ಜೋಗಿ ಕನ್ನಡ ಸಾರಸ್ವತ ಲೋಕದ ವಿಸ್ಮಯ, ಕುಡ್ಲಸೀಮೆಯ ಗಿರೀಶ್ ರಾವ್ ಎಂಬ ಹೆಸರಿನ ಈ ಗೆಳೆಯ ತಮ್ಮ ಪತ್ನಿ ಜ್ಯೋತಿಯ ಹೆಸರನ್ನು ತಮ್ಮ ನಾಮವಾಚಕದೊಂದಿಗೆ ಸಾಂಕೇತಿಕವಾಗಿ ಅಲಂಕರಿಸಿಕೊಂಡವರು, ಆ ಕಾವ್ಯನಾಮದೊಂದಿಗೆ ನಿರಂತರವಾಗಿ ಸವೆಯದೇ ಬರೆಯುತ್ತಿರುವವರು. ತಮ್ಮ ಬರಹಗಳಿಂದ ಅಪಾರ ಜನಪ್ರಿಯತೆ ಸಂಪಾದಿಸಿರುವ ಈತ ಕಣ್ಣಿಗೆ ಸಿಕ್ಕ ಕೃತಿಯನ್ನು ಓದಿ ಅರಗಿಸಿಕೊಳ್ಳುವ ವಾತಾಪಿ. ಈ ಅಪ್ರತಿಮ ಸೃಜನಶೀಲ ಸಾಹಸಿ ಸಾವಿರಾರು ಕೃತಿಗಳನ್ನು ಓದಿರಬಹುದು, ಅಷ್ಟೇ ಸಂಖ್ಯೆಯ ಜಗದ್ವಿಖ್ಯಾತ ಚಲನಚಿತ್ರಗಳನ್ನು ನೋಡಿರಲೂಬಹುದು. ಸದಾ ನೂರಾರು ಗೆಳೆಯರಿಂದ ಅಲಂಕೃತಗೊಂಡಿರುವ ಜೋಗಿ ಸರ್ವಋತು ಸ್ನೇಹಶೀಲ ವ್ಯಕ್ತಿ.

ಈಗ ಜೋಗಿ ಬರಹಗಳಿಗೆ ದಿಕ್ಸೂಚಿಯಾಗುವ ‘ಜೋಗಿ ವಾಚಿಕೆ’ ಹೊರಬರುತ್ತಿದೆ. ಈ ಜೋಗಿ ಜೋಳಿಗೆಯೊಳಗೆ ನೀವು ಕೈ ಹಾಕಲೇಬೇಕು. ಕನ್ನಡದ ಉತ್ತಮ ಓದುಗರಲ್ಲಿ ಒಬ್ಬರಾದ ಎನ್ ಸಂಧ್ಯಾರಾಣಿ ಅವರು ಈ ವಾಚಿಕೆಯನ್ನು ಸಂಪಾದಿಸಿದ್ದಾರೆ. ಕನ್ನಡದ ಸತ್ವವನ್ನು ಸರಿಯಾಗಿ ಮೊಗೆದು ಕೊಡುವ ಇವರು ಇಲ್ಲೂ ಯಶಸ್ವಿಯಾಗಿದ್ದಾರೆ.