ಆಲ್ಕೋಹಾಲ್ ಎನ್ನಿ, ಅಫೀಮು ಎನ್ನಿ, ಗಾಂಜಾ, ಚರಸ್, ಮಾರಿಹೋನಾ ಎನ್ನಿ, ಕೊಕೇನ್ ಎನ್ನಿ ಎಲ್ಲವೂ ಒಂದೇ. ಅಮಲು ತರಿಸುವ ಈ ವಸ್ತುಗಳೆಲ್ಲಾ ಒಂದೇ. ಸಿಹಿ ಲೇಪನದ ಅತ್ಯಂತ ಕಹಿ ಗುಳಿಗೆಗಳು. ಮಾದಕ ನಗೆಯನ್ನು ಮುಖದ ಮೇಲೆ ಹೊತ್ತು ಹತ್ತಿರ ಬರಲು ಆಕರ್ಷಿಸಿ, ಬಂದಾಗ ಅಪ್ಪಿ ಪ್ರಾಣ ಹೀರುವ ವಿಷಕನ್ಯೆಯರು. ಮಾದಕ ವಸ್ತುಗಳು ಇಂದು ದೊಡ್ಡ ಪಿಡುಗಾಗಿವೆ. ಅವುಗಳ ಮಾಯಾಜಾಲದಲ್ಲಿ ಮುಖ್ಯವಾಗಿ ನಮ್ಮ ಯುವ ಜನಾಂಗ ಸಿಲುಕಿ ಜರ್ಜರಿತವಾಗಿದೆ. ಮಾದಕ ವಸ್ತು ವ್ಯಕ್ತಿಯ ಮಾನವೀಯ ಗುಣಗಳನ್ನು ಕಳೆದು ಆಸುರೀಶಕ್ತಿಯನ್ನು ಉದ್ರೇಕಿಸಿ ಹೀನ ಅಪರಾಧಗಳನ್ನು ಮಾಡಲು ಪ್ರಚೋದಿಸುವ ಭಯಂಕರ ಸಾಧನವಾಗಿಬಿಟ್ಟಿರುವುದನ್ನು ಅನೇಕ ಜನ ಗಮನಿಸಿಲ್ಲ. ಮಾದಕ ವಸ್ತುವಿನ ಸೇವನೆಯಿಂದ ಮೈ-ಮನಸ್ಸಿನ ಸಮತೋಲನ ತಪ್ಪಿ, ಅನೇಕ ಬಗೆಯ ಮನೋ-ದೈಹಿಕ ಬೇನೆಗಳು ಕಾಣಿಸಿಕೊಳ್ಳುತ್ತವೆ. ಈ ವಸ್ತುಗಳಿಂದಾಗಿ ದಿನೇ ದಿನೇ ಅಪಘಾತ-ಅಪರಾಧಗಳು ಹೆಚ್ಚುತ್ತಿವೆ. ಇದರ ಬಗ್ಗೆ ಓದುಗರ ತಿಳಿವನ್ನು ಹೆಚ್ಚಿಸುವುದೇ ಈ ಕಿರುಹೊತ್ತಿಗೆಯ ಉದ್ದೇಶ.