ಇಪ್ಪತ್ತನೆಯ ಶತಮಾನ ಇದೀಗ ಮುಗಿದಿದ್ದು ಹೊಸ ಶತಮಾನದತ್ತ ನಾವು ಹೆಜ್ಜೆ ಇಡುತ್ತಿದ್ದೇವೆ. ಆದರೆ ಅಂಧಕಾರದ ತಾಂಡವದಲ್ಲಿ ದೇಶ ಥರಥರನೆ ನಡುಗುತ್ತಿದೆ. ಅದರ ಭಾರದಲ್ಲಿ ಬೆನ್ನು ಬಾಗಿಸಿಕೊಂಡೇ ನಾವು ಹೆಜ್ಜೆ ಹಾಕುತ್ತಿರಬೇಕೇನು? ಕಳೆದ ಎರಡು ಶತಮಾನಗಳಿಂದ ಅನೇಕ ಮಹಾಪುರುಷರು, ಪ್ರತಿಭಾಶಾಲಿಗಳು - ಅವರ ಬಗ್ಗೆ ನಮ್ಮ ಹೆಮ್ಮೆಗೆ ಸೀಮೆಯೇ ಇಲ್ಲ - ಬೇರೆ ಬೇರೆ ರೀತಿಗಳಲ್ಲಿ, ಬೇರೆ ಬೇರೆ ದೃಷ್ಟಿಕೋನಗಳಲ್ಲಿ ನಮ್ಮನ್ನು ಈ ಅಂಧಕಾರದ ವಿರುದ್ಧ ಎಚ್ಚರಿಸಿದ್ದಾರೆ. ಅವರ ಉತ್ತರಾಧಿಕಾರವನ್ನು ನಾವು ಮನಸ್ಸಿನಲ್ಲಿ ಇರಿಸಿಕೊಂಡರೆ, ಸ್ವಸ್ಥ ಮನಸ್ಸಿನಿಂದ ನಾವು ಮುಂದುವರಿಯಬಹುದು. ಅದಕ್ಕಾಗಿಯೆ ಈ ಸಂಕಲನ. ಅವರೆಲ್ಲರ ಮಾತುಗಳನ್ನು ಒಮ್ಮೆ ಓದಿದರೆ ಸಾಕು, ನಾವು ಧೈರ್ಯದಿಂದ ಮುಂದುವರಿಯಬಹುದು.