ವಿಜ್ಞಾನದ ವಿಷಯಗಳನ್ನು ಅಭ್ಯಾಸ ಮಾಡುವ ವಿದ್ಯಾರ್ಥಿಗಳಿಗೆ ಪಠ್ಯಕ್ಕೆ ಪೂರಕವಾಗಿ ಇನ್ನಷ್ಟು ಮಾಹಿತಿಗಳನ್ನು ತಿಳಿದುಕೊಳ್ಳುವಲ್ಲಿ ಈ ಪುಸ್ತಕ ಸಹಾಯಕ. ವಿಜ್ಞಾನದ ಪಾಠಗಳು ತುಂಬ ಕ್ಲಿಷ್ಟವಾಗಿದ್ದು ಪ್ರತ್ಯಕ್ಷ ಚಟುವಟಿಕೆ ಹಾಗೂ ಪ್ರಯೋಗಗಳ ಮೂಲಕ ಮಾತ್ರವೇ ಸಂಪೂರ್ಣ ಜ್ಞಾನ ಲಭ್ಯವಾಗುವುದು. ಕೇವಲ ಕಂಠಪಾಠ ಮಾಡಿಕೊಂಡು ಪರೀಕ್ಷೆಗೆ ತಯಾರಾಗುವುದು ಮತ್ತು ಪರೀಕ್ಷೆಯ ಅಂಕಗಳಿಗಾಗಿ ಅರ್ಧಂಬರ್ಧ ಜ್ಞಾನ ಗಳಿಸುವುದು ಮುಂದೆ ವೃತ್ತಿಜೀವನದಲ್ಲಿ ತೊಡಗಿದಾಗ ತೊಡಕಾಗಬಹುದು. ಹಾಗಾಗಿ ಇಂದಿನ ವಿದ್ಯಾರ್ಥಿಗೆ ವಿಷಯದ ಜ್ಞಾನ ಆಳವಾಗಿರಬೇಕಾದ್ದು ಅತೀ ಅವಶ್ಯ. ಈ ದೃಷ್ಟಿಯಿಂದ ನವಕರ್ನಾಟಕ ಪ್ರಕಾಶಾನ ಅಧ್ಯಾಪಕರು ಹಾಗೂ ವಿದ್ಯಾರ್ಥಿಗಳನ್ನು ಗಮನದಲ್ಲಿಟ್ಟುಕೊಂಡು “ವಿಜ್ಞಾನ ಸರಳ ಪರಿಚಯ ಮಾಲೆ” ಎಂಬ ಇಪ್ಪತ್ತೇಳು ಪುಸ್ತಕಗಳನ್ನು ವಿಷಯ ತಜ್ಞರಿಂದ ಬರೆಯಿಸಿ ಚಿತ್ರಗಳ ಸಹಿತ ಪ್ರಕಟಿಸಿದೆ. ಸರಳ ವಾಕ್ಯಗಳು-ಆಕರ್ಷಕ ಶೈಲಿಯಿಂದ ಅಚ್ಚುಕಟ್ಟಾಗಿ ಸುಲಭಗ್ರಾಹ್ಯವಾಗಿವೆ. ಅವುಗಳಲ್ಲೊಂದು - ರೋಗಗಳು ಮತ್ತು ಚಿಕಿತ್ಸೆ.