ಪಂಡಿತ ತಾರಾನಾಥರು ಶ್ರೇಷ್ಠಮಟ್ಟದ ಚಿಂತಕರು. ಅವರ ವ್ಯಕ್ತಿತ್ವ ಹಿರಿಯದು. ಪಂಡಿತ ತಾರಾನಾಥರ ಜನ್ಮಶತಮಾನೋತ್ಸವ ಸಂದರ್ಭ(೧೯೯೯)ದಲ್ಲಿ ಶ್ರೀ ಧ್ರುವನಾರಾಯಣ ಸಂಪಾದಿಸಿದ್ದ ಕೃತಿ ‘ತಾರಾ ಸ್ಮರಣೆ’. ತಾರಾನಾಥರ ಶಿಷ್ಯರು, ಸ್ನೇಹಿತರು, ಬಂಧುಗಳು ತಮ್ಮ ನೆನಪುಗಳ ಮೂಲಕ ತಾರಾನಾಥರ ಜೀವನ ದರ್ಶನವನ್ನು ಮಾಡಿಕೊಡುವ ಈ ಕೃತಿ ಹಲವು ಕಾರಣಗಳಿಗೆ ಮುಖ್ಯ. ಮೊದಲನೆಯದು ಒಬ್ಬ ಮನುಷ್ಯ ಹೀಗೆ ಬದುಕಬಹುದು ಎಂಬುದಕ್ಕೆ ಉದಾಹರಣೆಯಾಗಿ. ಯಾಕೆ ಬದುಕಬೇಕು ಎಂಬ ಪ್ರಶ್ನೆಗೆ ಉತ್ತರವಾಗಿ. ಅಷ್ಟೇ ಅಲ್ಲ; ಹೇಗೆ ಬದುಕಬೇಕು ಎಂಬುದಕ್ಕೆ ಕೂಡ. ರಾಜೀವ ತಾರಾನಾಥರು ಹೇಳುವಂತೆ ನಾವು ತಾರಾನಾಥರನ್ನು ನೋಡಬೇಕಿರುವುದು ಕೇವಲ ಆದರ್ಶಪುರುಷನೆಂದೋ, ಯೋಗಿಯೆಂದೋ, ವೈದ್ಯರೆಂದೋ, ಕ್ರಾಂತಿಕಾರಿಯೆಂದೋ ಅಲ್ಲ; ಅದೆಲ್ಲಕ್ಕಿಂತ ಹೆಚ್ಚಾಗಿ ಅವರ ಚಿಂತನೆಗಳನ್ನು, ವಿಚಾರಗಳನ್ನು ವಿಶ್ಲೇಷಿಸುವ ಮೂಲಕ. ನಿಜವಾದ ಅದು ಅವರಿಗೆ ನಾವು ತೋರಿಸುವ ಗೌರವ. ವಿಶ್ಲೇಷಣೆಯೆಂದರೆ ವಿಚಾರದ, ಚಿಂತನೆಯ ಮುಂದುವರಿಕೆಯೆಂತಲ್ಲವೇ?