ವಿದ್ಯಾರ್ಥಿಗಳು ತಮ್ಮ ಬುದ್ಧಿಶಕ್ತಿಗೆ ತಕ್ಕಂತೆ, ಲಭ್ಯವಿರುವ ಸಂಪನ್ಮೂಲಗಳನ್ನು, ಅವಕಾಶಗಳನು ಗರಿಷ್ಠಮಟ್ಟದಲ್ಲಿ ಬಳಸಿಕೊಂಡು, ಪರೀಕ್ಷೆಗಳಲ್ಲಿ ಉತ್ತಮ ಮಟ್ಟವನ್ನು ತೋರಬೇಕಾದರೆ ಅವರ ಮನಸ್ಸು ನೆಮ್ಮದಿಯಿಂದಿರಬೇಕು. ಯಾವುದೇ ಸಮಸ್ಯೆ ಅವರನ್ನು ಬಾಧಿಸಲಾರಂಭಿಸಿದರೆ ಅವರ ಕಲಿಕೆ, ಪರೀಕ್ಷಾ ನಿರ್ವಹಣೆಗೆ ಅಡ್ಡಿಯಾಗುತ್ತದೆ. ಆದ್ದರಿಂದ ವಿದ್ಯಾರ್ಥಿಗಳ ಮನೋ-ಸಾಮಾಜಿಕ ಸಮಸ್ಯೆಗಳ ಬಗ್ಗೆ ತಂದೆ ತಾಯಿಗಳು, ಶಿಕ್ಷಕರು ಹಾಗೂ ಸಂಬಂಧಪಟ್ಟವರು ತೀವ್ರ ಗಮನವನ್ನು ಹರಿಸಬೇಕು. ಇವುಗಳ ನಿವಾರಣೆಗೆ ಸಕ್ರಿಯವಾಗಿ ಪ್ರಯತ್ನ ಮಾಡಬೇಕು. ಸಮಸ್ಯೆ ತಂದೆ ತಾಯಿ - ಕುಟುಂಬದಲ್ಲಿರಬಹುದು, ಶಾಲಾ-ಕಾಲೇಜು ಶಿಕ್ಷಕ ಸಹಪಾಠಿಗಳಲ್ಲಿರಬಹುದು, ನೆರೆಹೊರೆ ಸಮಾಜದಲ್ಲಿರಬಹುದು ಅಥವಾ ವಿದ್ಯಾರ್ಥಿಯ ವ್ಯಕ್ತಿತ್ವ ಹಾಗೂ ಅಂತರಾಳದಲ್ಲೇ ಇರಬಹುದು. ಸಮಸ್ಯೆಯನ್ನು ಗುರುತಿಸಿ ಅದರ ಉಗಮ, ಬೆಳವಣಿಗೆ ಸ್ವರೂಪವನ್ನು ಅರ್ಥಮಾಡಿಕೊಂಡು, ಆನಂತರ ಪರಿಹಾರೋಪಾಯಗಳನ್ನು ಯೋಜಿಸಬೇಕಾಗುತ್ತದೆ. ಈ ದಿಸೆಯಲ್ಲಿ ಈ ಪುಸ್ತಕ ವಿದ್ಯಾರ್ಥಿಗಳಿಗೆ, ಪಾಲಕ-ಪೋಷಕರಿಗೆ, ಶಿಕ್ಷಕರಿಗೆ ನೆರವಾಗುತ್ತದೆ.